U Rwanda rwizihije ku nshuro ya 40 Umunsi Mpuzamahanga w’Abakorerabushake, ku rwego rw’Igihugu, ibirori byabereye mu Karere ka Rubavu bihuriza hamwe abakorerabushake barenga 500 baturutse hirya no hino mu Gihugu. Insanganyamatsiko y’uyu mwaka igira iti “Gukorerabushake, Ishema ryacu.”

Mu ijambo ry’ikaze, Umuyobozi w’Akarere ka Rubavu yashimiye byimazeyo uruhare rukomeye rw’abakorerabushake mu guteza imbere imibereho myiza y’abaturage, by’umwihariko mu gufasha imiryango itishoboye no gutabara mu bihe by’ibiza byibasiye Akarere. Yagaragaje ko imbaraga n’ubwitange by’abakorerabushake ari inkingi ikomeye mu rugendo rw’iterambere rirambye n’ubumwe bw’Abanyarwanda.

Minisitiri w’Ubutegetsi bw’Igihugu wungirije, Madamu Kayisire Marie Solange, yashimangiye ko abakorerabushake bagira uruhare rufatika mu kubaka amahoro, gutabara mu bihe by’ibiza, guteza imbere umutekano no kurwanya imirire mibi n’igwingira mu bana, byose bikagira uruhare runini mu kuzamura imibereho myiza y’Abanyarwanda. Yongeyeho ko ibikorwa byabo bikwiye guhabwa agaciro no gukomeza gushimirwa mu buryo burambye.

Ku ruhande rw’abafatanyabikorwa, Uhagarariye UNDP mu Rwanda, Madamu Fatmata Sesay, yagaragaje ko gukorerabushake bitagendera ku myaka y’umuntu, ahubwo bishingira ku mutima witeguye gukorera abandi. Yashimangiye ko umuco wo gukorerabushake ushingiye ku ndangagaciro nyarwanda zirimo ubunyangamugayo, ubumuntu n’ubufatanye, bikaba ari inkingi ikomeye mu iterambere ry’Igihugu.

Ibi birori byitabiriwe n’abayobozi batandukanye barimo Guverineri w’Intara y’Iburengerazuba, Perezida w’Inama Njyanama y’Akarere ka Rubavu, abayobozi b’uturere tugize Intara, inzego z’umutekano zirimo Ingabo z’u Rwanda (RDF), Polisi y’u Rwanda, Urwego rw’Igorora (RCS), DASSO, ndetse n’abakorerabushake baturutse mu bice bitandukanye by’Igihugu.

Kwizihiza uyu munsi byongeye kugaragaza ko gukorerabushake ari ishema ry’Abanyarwanda, kandi ko ubwitange bw’abakorerabushake bukomeje kugira uruhare rukomeye mu kubaka u Rwanda rufite amahoro, umutekano n’iterambere rirambye