Kuri uyu Gatandatu tariki 08 Werurwe 2025 mu Murenge wa Bugeshi hizihirijwe umunsi mpuzamahanga w'umugore ku nshuro ya 50 ufite insanganyamatsiko igira iti "Umugore ni uw'agaciro." Ibirori byitabiriwe n'abashyitsi batandukanye barimo abagize Inteko Ishinga Amategeko y'u Rwanda; Senateri Havugimana Emmanuel, Depite Muzana Alice, Depite Nyiramana Christine na Depite Kalisa Jean Sauveur, Umunyamabanga Uhoraho w’Intara Uwambajemariya Florence, abagize abagize Inama Njyanama y’Akarere, Komite Nyobozi y’Akarere, n’abafatanyabikorwa batandukanye bifatanyije n’abaturage kwizihiza uyu munsi.

Mu birori bibereye ijisho abagore ba Rubavu bishimira ko bafite umutekano watumye batinyuka bagakora bakiteza imbere ndetse bagateza imbere imiryango yabo, bamaze kugera kuri byinshi binyuze mu mashyirahamwe y'ubuhinzi bw'ibihingwa bitandukanye, ubucuruzi, ubushabitsi n’ibindi. 

Uhagarariye Inama y’Igihugu y’abagore yasabye imiryango ibana mu makimbirane ko bakwiye kubana bumvikana bimakaza umuco w’ibiganiro mu gukemura ibibazo bihari. Yagize ati “ Abagore bishimiye umutekano kuko biboneye ko Igihugu kirinzwe, kandi bishimira iterambere kuko byatumye Umugore atinyuka agakora akiteza imbere ndetse agateza imbere n’umuryango we.’’ Yongeyeho ati “iyo umuryango uteye imbere n’Igihugu kiba giteye imbere, iyo umugore n’umugabo bafatanyije bitanga icyizere cy’ejo hazaza.’’ Yasabye imiryango kubana mu mahoro birinda kugira umuryango uzira amakimbirane n’ihohotera iryo ari ryo ryose.

Depite Muzana Alice yavuze ko iterambere ry’umugore rifitanye isano n’umutekano, asaba abagore gukomeza kubaka umuryango ushikamye.

Yagize ati: ‘‘Abagore turashoboye kandi tugomba gukomeza guteza imbere imiryango yacu. Iterambere ry’umugore si irye gusa, ni iry’igihugu cyose. Tugomba gukorana n’ibigo by’imari, tugashora imari, tukava mu bukene kandi tukagira uruhare mu bukungu bw’igihugu.’’