Kuri uyu wa 08 Kamena, NCBA Bank Rwanda yishimiye gutangiza ku mugaragaro ishami rishya rya Rubavu, ikaba ari intambwe ikomeye mu rugendo rwo kwagura ibikorwa no kwegera abakiriya mu mpande zose z’igihugu. Iri shami rishya ni igisubizo cy’inyota y’abakiriya bifuza serivisi z’imari zinoze, ndetse rikaba rishyigikira intego za NCBA zo gufasha ubucuruzi gukura no guteza imbere ubukungu bw’akarere.

Uyu muhango witabiriwe n’ubuyobozi bukuru bwa NCBA Bank Rwanda, umuyobozi w’Akarere ka Rubavu ushinzwe Iteramnere ry'ubukungu NZABONIMPA Deogratias, abahagarariye inzego zitandukanye ndetse n’abakiriya bayo b’ingenzi. Abitabiriye bashimangiye ko iri shami rizafasha kongera imbaraga mu bikorwa by’iterambere no guteza imbere umwanya wa Rubavu nk’ihuriro rikomeye ry’ubucuruzi mu Rwanda no mu karere.

Mu ijambo rye, Umuyobozi w'Akarere wungirije ushinzwe iterambere ry'ubukungu yagaragaje ko yishimiye itangizwa ry'iri shami ati “Twishimiye kwakira ishyirwaho ry’ishami rya NCBA Bank hano mu Karere ka Rubavu, kuko ari intambwe ikomeye mu guteza imbere ubucuruzi n’ishoramari. Iri shami rizafasha abacuruzi, abashoramari n’abaturage muri rusange kubona serivisi z’imari hafi yabo, bityo bibafashe kubyaza amahirwe ari mu karere kacu umusaruro ndetse no mu Ntara y’Iburengerazuba muri rusange. Turashimira NCBA Bank ku cyizere itugiriye no kudufasha mu rugendo rwo kubaka Rubavu nk’ihuriro rikomeye ry’ubukungu n’ishoramari n'ubukerarugendo mu gihugu no mu karere.”

Mu gihe cyo gutangiza iri shami, Ubuyobozi bwa NCBA Bank Rwanda bwagaragaje ishimwe ku bafatanyabikorwa bayo n’abakiriya, yongera kwemeza ko izakomeza gushyigikira iterambere ry’Akarere ka Rubavu binyuze mu guhanga udushya, gutanga serivisi z’imari zigezweho no guteza imbere ibikorwa bifasha abaturage kwiteza imbere.