Mu rwego rwo kongera umusaruro w’ubuhinzi no kunoza serivisi zihabwa abahinzi, Akarere ka Rubavu buri mwaka gategura inama ihuza inzego z’ubuyobozi n’abafatanyabikorwa b’ubuhinzi. Nyuma yo kubona ko mu mwaka ushize hagaragaye imbogamizi zirimo gutinda gutanga inyongeramusaruro no kuba igipimo cy’abitabira ubwishingizi bw’ibihingwa kikiri hasi, iyi nama yateguwe hagamijwe gusuzuma ibyagezweho no gufata ingamba nshya ku gihembwe cya 2026A.

Ku wa 06 Kamena 2025, Umujyanama wa Komite Nyobozi y’Akarere ka Rubavu yayoboye inama yo gutegura igihembwe cy’ihinga cya 2026A. Iyo nama yahuje ubuyobozi bw’Akarere, abashinzwe ubuhinzi mu mirenge, abafashamyumvire mu buhinzi, ndetse n’abacuruzi b’inyongeramusaruro bakorera mu Karere ka Rubavu.

Inama yibanze ku gusuzuma ibyagezweho mu mwaka w’ihinga ushize no kugena aho imbaraga zikwiye kwiyongera. Hanaganiriwe ku ngamba zirimo kwegera abahinzi no kubaha serivisi inoze, kubagezaho imbuto n’ifumbire ku gihe, no kongera igipimo cy’abitabira ubwishingizi bw’ibihingwa hagamijwe kurinda abahinzi igihombo gituruka ku mpamvu zitunguranye.

Mu ijambo rye, Umujyanama wa Komite Nyobozi y’Akarere yashimye intambwe imaze guterwa mu mwaka ushize, ariko asaba ko ubufatanye bukomeza gusigasirwa no kwagurwa. Yagize ati: “Ubuhinzi ni umusingi w’imibereho y’abaturage bacu. Iyo umuhinzi abayeho neza, Akarere kose kaba keza. Ni ngombwa ko ingamba dufashe uyu munsi zishyirwa mu bikorwa, bigatanga umusaruro ufatika.”

Yongeyeho ko kugira ngo ibyo bigerweho, buri wese ufite aho ahuriye n’ubuhinzi akwiye kugira uruhare mu gukurikirana ibikorwa no gushyigikira abahinzi ku buryo bufatika.

Iyi nama yanasojwe hashyirwaho uburyo buhamye bwo gukurikirana ishyirwa mu bikorwa ry’imyanzuro yafashwe, hagamijwe ko igihembwe cy’ihinga cya 2026A kiba icy’intambwe ikomeye mu kongera umusaruro no guteza imbere imibereho y’abahinzi b’i Rubavu.