Kuri uyu wa 24 Ukwakira 2025, mu Karere ka Rubavu habereye ibiganiro by’Ihuriro ry’Ubumwe n’Ubudaheranwa by’Abanyarwanda, byitabiriwe n'Umuyobozi Mukuru wa BDF, Bwana Vincent Munyeshyaka, Abagize Inama Njyanama y’Akarere, Abagize Komite Nyobozi y’Akarere, Abakozi bakorera ku Karere, Abahoze ari abayobozi, ndetse n’Abagize Ihuriro ku rwego rw’Akarere n’imirenge.

Ibi biganiro byari bigamije kurebera hamwe gahunda zimakaza ihame ry’Ubumwe n’Ubudaheranwa by’Abanyarwanda, gusuzuma inzitizi zikibubangamiye no kungurana ibitekerezo ku buryo bwo kuzisohokamo hagamijwe kubaka sosiyete nyarwanda ibumbatiye indangagaciro z’ubwiyunge, ukwiyubaka no gukunda igihugu.

Mu butumwa bwatanzwe n’Umuyobozi w’Akarere mu gutangiza inama, yagarutse ku ishyirwa mu bikorwa ry’imyanzuro y’Ihuriro ry’ubumwe n’ubudaheranwa ryabaye mu mwaka ushize wa 2024, ashimangira ko gukomeza kwimakaza izi ndangagaciro ari inshingano z’Abanyarwanda bose.

Abitabiriye ibiganiro bagarutse ku musanzu wabo mu gukomeza kubumbatira ubumwe n’ubudaheranwa, banatanga ibitekerezo bigamije gukomeza guharanira iterambere rishingiye ku bumwe n’imiyoborere myiza.

Mu myanzuro y’ihuriro, hagarutswe ku ngamba zirimo gukomeza ibiganiro by’ubumwe mu bigo bya Leta n’ibyigenga, kwegera abemeye icyaha cya Jenoside yakorewe Abatutsi mu 1994 kugira ngo bafashwe gusubira mu buzima busanzwe, ndetse no gukomeza guteza imbere gahunda yo guhuza abarokotse na bamwe mu bakoze Jenoside mu rwego rwo kubaka icyizere n’ubudaheranwa.

Ihuriro ryasabye kandi ko amadini n’amatorero yakongera kugira uruhare mu kwimakaza gahunda ya Ndi Umunyarwanda, hagahugurwa abayobozi b’amadini ku ndangagaciro z’ubumwe, ubudaheranwa no gukemura amakimbirane mu miryango, ndetse hanakomezwa gusura inzibutso za Jenoside kugira ngo amateka akomeze gusigasirwa.

Mu butumwa bw’Umushyitsi Mukuru, Bwana Vincent Munyeshyaka, yashimangiye ko gahunda ya Ndi Umunyarwanda idafite igihe izarangirira, ahubwo ari urugendo rugamije guhozaho kwiyubaka no kubaka igihugu gishyize hamwe. Yasabye ko abayobozi bakomeza kuba indorerwamo y’abo bayobora, bakora ibyo bavuga kandi bagaharanira kuba intangarugero mu myitwarire no mu ndangagaciro z’umuco nyarwanda.

Yibukije kandi ko ubufatanye hagati y’ubuyobozi, amadini n’abaturage ari ingenzi mu gusigasira ubumwe bw’Abanyarwanda, anashimira Unity Club Intwararumuri ku ruhare igira mu guhuza abayobozi bari mu nshingano n’abazirangije kugira ngo bafatanye mu kwimakaza indangagaciro z’Ubumwe n’Ubudaheranwa.

Mu gusoza, Umushyitsi Mukuru yashimiye abaturage b’Akarere ka Rubavu ku ntambwe bamaze gutera mu kubaka ubumwe n’ubudaheranwa, abasaba gukomeza gushyira imbaraga mu bikorwa byose bigamije iterambere rishingiye ku bumwe, ubwitange no gukunda igihugu.