Kuri uyu wa Gatandatu, mu Murenge wa Gisenyi, Akagari ka Rubavu, Umudugudu wa Ruliba, hatangijwe ukwezi kw’ibikorwa by’abakorerabushake hifashishijwe Umuganda udasanzwe wahurije hamwe urubyiruko rw’abakorerabushake n’abaturage b’ingeri zitandukanye.

Uyu muganda witabiriwe n’abayobozi batandukanye barimo Madamu Uwineza Francine, Umunyamabanga Nshingwabikorwa w’Umurenge wa Gisenyi, ari kumwe na Bwana Rwibasira Jean Bosco, uhagarariye urubyiruko rw’abakorerabushake mu Karere ka Rubavu akaba n’Umunyamabanga Nshingwabikorwa w’Umurenge wa Rubavu, ndetse na Bwana Habimana Martin, Umuyobozi w’Ishami ry’Imiyoborere Myiza mu Karere ka Rubavu.

Mu bitabiriye kandi harimo abahagarariye ibikorwa bya Community Policing mu Karere, abakozi b’Akarere n’abakorera mu tugari, Umuyobozi w’Ikigo cy’Urubyiruko cya Rugerero, urubyiruko rw’abakorerabushake mu Mirenge ya Gisenyi na Rubavu, abakozi ba DASSO, abanyeshuri bo muri College Baptiste na TTC Rubavu, abamotari, abashoferi b’amagare ndetse n’abaturage bo muri rusange.

Abitabiriye umuganda bakoze ibikorwa bitandukanye bigamije kubungabunga ibidukikije n’imisozi birimo gutwara no gutera ibiti mu musozi wa Rubavu, gucukura ibyobo byo guteramo ibiti no guteramo imbingo zifasha kurwanya isuri. Mu rwego rwo kurwanya isuri no kurengera ibidukikije, hatewe ibiti 2,500 ku buso bwa hegitari ebyiri ku musozi wa Rubavu.

Mu butumwa bwe, Madamu Uwineza Francine, Umunyamabanga Nshingwabikorwa w’Umurenge wa Gisenyi, yashimiye abitabiriye umuganda abasaba gukomeza kubungabunga umusozi wa Rubavu no gukomeza ibikorwa by’isuku n’iterambere rirambye. Bwana Rwibasira Jean Bosco na Bwana Habimana Martin basobanuye akamaro k’umuganda n’ibikorwa by’ubukorerabushake mu guteza imbere igihugu, basaba ko umusozi wa Rubavu ukomeza kurindwa no guterwaho ibiti byinshi mu rwego rwo kurwanya isuri no guteza imbere ubuzima bwiza bw’abaturage.