Kuri uyu wa Kabiri, tariki ya 16 Nzeri 2025, Umuyobozi w’Akarere ka Rubavu, Bwana MULINDWA Prosper, yifatanyije n’abaturage bo mu Murenge wa Nyundo mu gutangiza ku mugaragaro igihembwe cy’ihinga 2026A.

Mu butumwa yagejeje ku baturage, Umuyobozi w’Akarere yabasabye kurushaho kubungabunga ubutaka no kububyaza umusaruro, bifashisha ifumbire n’imbuto z’indobanure, kugira ngo ubuhinzi bukomeze gutanga umusaruro ufatika.

Ni mu gihe Umuyobozi w’Akarere wungirije ushinzwe iterambere ry’ubukungu, NZABONIMPA Deogratias, nawe yatangije iki gihembwe mu Murenge wa Nyakiliba, aho yasuriye ikigega cy’umusaruro w’ibirayi cya Bazirete. Yashishikarije abaturage kuzamura umusaruro, bityo Nyakiliba ikaba “ikigega cy’umusaruro w’imbere mu gihugu” ndetse abaturage bakabasha gusagurira amasoko.

Iki gikorwa cyo gutangiza igihembwe cy’ihinga kiri mu murongo wo gukomeza guteza imbere ubuhinzi nk’ishingiro ry’iterambere ry’abaturage b’Akarere ka Rubavu.