Kuri uyu wa 10 Kanama 2025, nibwo hatangijwe ku mugaragaro gahunda ya SmileZone, umwanya w’Abanyarwenya n’abandi bafite impano zo gusetsa no gususurutsa abaturage. Uyu mushinga uzajya uba buri wa Gatanu wa nyuma w’ukwezi, ukaba watangiriye kuri Hanga Hub Rubavu.

Mu ijambo rye, Umuyobozi w'Akarere wungirije ushinzwe iterambere ry'ubukungu NZABONIMPA Deogratias watangije iyi gahunda yashimye iki gitekerezo gishyigikira impano z’urubyiruko, asaba ko ibyagezweho n’ubuyobozi bubegereje byabyazwa umusaruro binyuze mu guhanga udushya, gukorera hamwe, gukunda umurimo, gusigasira indangagaciro n’umuco nyarwanda, ndetse no kwirinda ubusambanyi, inzoga n’ibiyobyabwenge. Yanibukije ko urubyiruko rugomba gushyira imbaraga mu ishyirwa mu bikorwa rya gahunda y’iterambere ya NST2.

Umuhuzabikorwa w’Urubyiruko mu Karere ka Rubavu, Ngoga Kalisa Deo, nawe yibukije urubyiruko akamaro ko gukunda umurimo no gukunda igihugu, kubyaza amahirwe akazi gahari, kwihangira imirimo, kuyoboka imyuga no guhanga udushya nk’inzira yo kugera ku iterambere rirambye.

SmileZone iteganyijwe kuba urubuga ruhuza abanyarwenya, abakunzi b’ibiganiro bishimishije, ndetse n’abafite impano zitandukanye, hagamijwe gutanga umusanzu mu kubaka umuco wo guhanga no guteza imbere impano z’Abanyarwanda.