Kuri uyu wa 20 Ukwakira 2025, Ku bufatanye n'Ikigo Imanzi Business Institute, Urugaga rw'Abikorera PSF mu Ntara y'Iburengerazuba, Umuyobozi w’Akarere ka Rubavu, Bwana Mulindwa Prosper, yatangije ku mugaragaro amahugurwa y’iminsi 10 yiswe Investment Readiness Training Program ategurwa na Imanzi Business Institute ku bufatanye na PSF Rwanda (Private Sector Federation), agamije guteza imbere ubucuruzi n’ishoramari mu rubyiruko rwo mu Ntara y’Iburengerazuba.

Aya mahugurwa yibanda ku guteza imbere ibigo bito n’ibiciriritse (MSMEs) bikora mu rwego rw’ubuhinzi, binyuze mu buryo bwo kubafasha kubona no gukoresha neza imari ishingiye ku mahirwe adaheza (inclusive finance).

Mu ijambo rye ryo gufungura aya mahugurwa, Umuyobozi w'Akarere Mulindwa Prosper yashimiye urubyiruko rwitabiriye, arushishikariza gukomeza gushora ubumenyi n’ubushobozi bifite mu guteza imbere ubuhinzi n’iterambere ry’igihugu muri rusange. Yagize ati “Abashoramari nkamwe ni bo igihugu cyacu gikeneye - abafata iya mbere mu guhanga udushya, guteza imbere ubuhinzi, no guhindura imibereho y’abaturage ibereye bose.”

Aya mahugurwa azasiga ahawe urubyiruko 25 ubumenyi bwimbitse ku bijyanye n’itegurwa ry’imishinga y’ishoramari, imicungire y’imari, uburyo bwo gushaka abafatanyabikorwa, ndetse no kumenya uburyo bushya bwo gukoresha ikoranabuhanga mu iterambere ry’ubuhinzi.