Kuwa kabiri tariki  9 Mata 2024, Akarere ka Rubavu hamwe n’abaturage b’Umurenge wa Nyundo ndetse n’abandi bayobozi batandukanye bifatanyije n’abarokotse Jenoside yakorewe Abatutsi, imiryango n’inshuti, kunamira no kwibuka ababyeyi, abavandimwe, abana, inshuti n’abaturanyi bashyinguye mu rwibutso rwa jenoside rwa Nyudo. Hashyinguwe mu cyubahiro indi mibiri  7 yabonetse mu karere ka Rubavu n’Akarere ka Rutsiro.

 Ni igikorwa cyabanjirijwe n’umugoroba wo kwibuka,  abantu basobanurirwa amateka n’ubukana Jenoside yakoranwe mu karere ka Rubavu ndetse n’ubuhamya butandukanye bw’abarokotse Jenoside muri aka karere,   bagaragaza inzira y’umusaraba banyuze, aho Umushyitsi Mukuru muri uyu mugoroba yari Guverineri w’Intara y’Uburengerazuba Hon Dushimimana Lambert.

Kumunsi nyir’izina wo gushyingura mu cyubahiro imbiri 7 y’Abatutsi bishwe muri Jenoside yakorewe Abatutsi, ni umuhango nanone wabereye ku rwibutso rwa Nyundo ahari hateraniye abaturage n’abayobozi batandukanye mu nzego zose baturutse muturere twa Rubavu na Rutsiro.

Umushyitsi Mukuru muri uyu muhango Dr. Sabin NSANZIMANA akaba n’Imboni y’Akarere ka Rubavu, yagaye abakoze Jenoside bikomotse ku ngengabitekerezo babibwemo na Leta mbi yariho mu gihe cya Repubulika yambere n’iya kabiri,  maze ahamagarira  urubyiruko kutazagwa mu mutego nk’uwo urubyiruko rwakoze Jenoside rwaguyemo, ahubwo bakagira ubutwari bwo kurwanya Jenoside n’ingengabitekerezo yose iganisha ku rwango n’amacakubiri.

Yagize ati ” Mu gihe cya Jenoside yakorewe Abatutsi, hari leta yari ishishikajwe no gutsemba abaturage bayo ariko hari n’abantu banga gushyigikira ikibi bafite umutima mwiza. Jenoside yadutwaye inshuti, idusenyera Igihugu ndetse isiga ingaruka nyinshi tugihanganye nazo. Na n’uyu munsi mwazibonye zaba izigaragara inyuma, ku mubiri, ku mutima ndetse n’izitagaragarira amaso y’abantu. Ariko ntamahoro y’umunyabyaha, ukora ikibi, uwica abandi abuzwa amahoro n’ubutabera kandi n’Imana Izabimubaza.”

Agaruka ku masomo u Rwanda n’isi bavanye ku mateka ya Jenoside yakorewe Abatutsi, yavuze ko ari amahitamo y’u Rwanda guhangana n’ikibi uko byamera kwose. Yagize ati ” n’ubwo u Rwanda rwasigara rwonyine ruhanganye n’isi yose hamwe na miliyoni 14 z’abaturage, twasigara duhangana n’icyashaka kudusubiza inyuma.”

Umuyobozi wa Ibuka mu karere ka Rubavu Mbarushimana Gerard yavuze ko n’ubwo abarokotse bamaze kwiyubaka, ko  bagitewe impungenge n’abantu bagikomeje guhembera ingengabitekerezo ya Jenoside  no gupfobya Jenoside yakorewe Abatutsi,  kandi hakaba harimo n’urubyiruko.  

Mu izina ry’abarokotse Jenoside yakorewe Abatutsi na Ibuka, yongeye asaba abaturage gutanga amakuru y’aho imibiri y’Abatutsi bishwe iri kugira ngo babashe kuyishyingura mu cyubahiro,kuko biruhura umutima w’uwarokotse Jenoside gushyingura mu cyubahiro uwe. .

Imibiri 7 y’abishwe muri Jenoside yakorewe Abatutsi yashyinguwe mu rwibutso  rwa Nyundo ije isanga imibiri 1019 iruhukiye muri uru rwibutso  y’abishwe baturutse mu cyahoze ari Komini Kanama, Nyamyumba na Rubavu iri kumwe  n’indi ibihumbi 9041 icumbikiwe muri uru rwibutso yakuwe mu rwibutso  rwa Bigogwe,  kuri ubu rurimo gusanwa.