Mu Murenge wa Nyamyumba, hizihirijwe Umunsi wahariwe Ingo Mbonezamikurire y’Abana bato (ECD Day) ku rwego rw’Akarere ka Rubavu, hagamijwe gushimangira uruhare rw’ababyeyi n’abafatanyabikorwa mu guteza imbere imikurire myiza y’abana bato.

Ibi birori byitabiriwe n'Umuyobozi w'Akarere wungirije ushinzwe imibereho myiza y’abaturage, byitabirwa n’abayobozi b’inzego zitandukanye, ababyeyi, n’abafatanyabikorwa mu guteza imbere uburere bw’abana.

Mu butumwa bwe, Visi Meya ISHIMWE Pacifique yashimye ababyeyi n’abafatanyabikorwa ku ruhare bagira mu kurera neza abana no kububakira ejo hazaza heza binyuze mu kubaka no gufasha amarerero y’abana. Yavuze ko guha umwana uburere bufite ireme ari ishingiro ry’iterambere ry’igihugu aho yagize ati “Iyo umwana akuriye mu rukundo rw'ababyeyi, akabona indyo yuzuye, uburere n’uburezi bikwiye, tuba dufite ejo heza. Ni yo mpamvu dushimira ababyeyi, amakoperative n’abafatanyabikorwa batanga umusanzu mu guteza imbere amarerero y’abana bato”.

Mu birori by’uyu munsi, hafunguwe ku mugaragaro Irerero rishya rya Cooperative CEMINYAKI, icukura amabuye y’agaciro mu Murenge wa Nyamyumba. Iri rerero ryubatswe nk’urugero rwiza rugaragaza uko ibikorwa by’ubucuruzi bishobora kugira uruhare mu kurengera no guteza imbere abana bato.

Abayobozi bitabiriye umuhango bagaburiye abana, mu gihe abarezi bo mu marerero bahawe ibikoresho byo kwifashisha mu mirimo yabo ya buri munsi, birimo imikeka n’ibikinisho bigamije gufasha abana kwiga bakina.

Visi Meya ushinzwe imibereho myiza yasabye kandi amakoperative, abakoresha n’abikorera gushyiraho amarerero y’abana mu bigo byabo, kugira ngo ababyeyi bajye bakorera mu mutuzo bazi ko abana babo barimo kwitabwaho neza.

Yibukije ababyeyi ko kugira isuku, gutegurira abana indyo yuzuye no kwirinda indwara zituruka ku mwanda ari inkingi z’ingenzi mu mikurire myiza y’umwana.

Uyu munsi w’Ingo Mbonezamikurire y’Abana wizihizwa buri mwaka hagamijwe gukangurira buri wese uruhare rwe mu kurera neza umwana, kugira ngo akure afite ubuzima bwiza, ubwenge n’imico myiza bimufasha kuba umuturage w’inyangamugayo ufitiye igihugu akamaro.