Mu Igororero rya Rubavu, ku wa 23 Mutarama 2026, hatangijwe ku mugaragaro ubukangurambaga ku butabera nsanasano, bugamije kwimakaza ubwumvikane bushingiye ku kwemera icyaha, burimo ubwumvikane hagati y’uwakoze icyaha n’uwagikorewe (Victim Offender Mediation) ndetse n’ubwumvikane hagati y’uwakoze icyaha n’ubushinjacyaha (Plea Bargaining).

Ubu bukangurambaga bwatangiye mu cyumweru cyahariwe uburyo bw’ubwumvikane bushingiye ku kwemera icyaha, bwabereye mu magororero yose yo mu gihugu bugamije gushishikariza abakoze ibyaha kwemera icyaha mu bwumvikane, hagamijwe kwihutisha imanza no guteza imbere ubutabera busana.

Umushinjacyaha Mukuru, Madamu Angélique Habyarimana, yasabye abagororwa kwitabira iyi gahunda, agaragaza ko kuyigana bizabafasha gusobanukirwa neza uburenganzira bwabo, guhitamo neza ibyabagirira akamaro ndetse no kugira uruhare mu kwihutisha imanza zabo. Yongeyeho ko kwimakaza iyi gahunda bizafasha kuzamura ubutabera busana no kugabanya ubukererwe n’uburarane bw’imanza mu nkiko.

Ku ruhande rwe, Umuyobozi w’Akarere ka Rubavu, Mulindwa Prosper, yasabye abafungiye mu Igororero rya Rubavu kubyaza umusaruro amahirwe bahawe n’iyi gahunda, agaragaza ko ubutabera nsanasano bushishikariza impande zirebwa n’icyaha gushakira ibisubizo hamwe hatabayeho kwishingikiriza gusa ku nkiko.

Iki gikorwa cyitabiriwe n’abayobozi batandukanye barimo Perezida w’Urukiko Urugereko rwa Musanze, Justice Emmanuel Itamwa, Perezida w’Urukiko Rwisumbuye rwa Rubavu, Umushinjacyaha mu Rukiko Rwisumbuye rwa Rubavu, Umuyobozi wa Polisi mu Karere ka Rubavu, Umuyobozi wa NISS mu Karere, Umuyobozi w’Igororero rya Rubavu ndetse n’uhagarariye DASSO.

Ubu bukangurambaga ni igikorwa kiba ngaruka kwezi, kimaze kwitabirwa n’abantu barenga 2,900 mu gihugu hose. Bwagaragaye bwa mbere ku wa 13 Mutarama 2026, butangirizwa mu Igororero rya Nyarugenge na Nyakubahwa Perezida w’Urukiko rw’Ikirenga.