Kuri uyu wa 30 Gicurasi 2025, Minisitiri w’Ubucuruzi n’Inganda,  Prudence Sebahizi, yifatanyije na Guverineri w’Intara y’Iburengerazuba Bwana Jean Bosco Ntibitura, abayobozi b’Uturere, abikorera, urubyiruko n’abandi bafatanyabikorwa mu nama yateguwe hagamijwe kungurana ibitekerezo ku ihangwa ry’umurimo unoze, yabereye mu Karere ka Rubavu.

Iyi nama yitabiriwe n’abasaga 500 baturutse mu nzego zitandukanye, yateguwe ku bufatanye n’inzego za Leta n’abikorera, ifite insanganyamatsiko igira iti: “Ihangwa ry’Umurimo, Intego Dusangiye Twese.”

Minisitiri Sebahizi yatangaje ko iyi nama ari amahirwe yo kurebera hamwe uko ubufatanye hagati ya Leta n’abikorera bwabyara umusaruro mu rwego rwo guhanga imirimo. Yibukije ko Leta yihaye intego yo guhanga imirimo 250,000 buri mwaka, bityo hakenewe ibikorwa bifatika n’ubufatanye bw’inzego zose. Yagize ati “Dukeneye kongera ubumenyi bw’urubyiruko no kurufasha kubona amahirwe yo kwihangira umurimo. Abikorera bafite uruhare rukomeye mu gutanga amahugurwa, imyitozo ngiro n’amahirwe yo kwimenyereza umurimo ku rubyiruko.” 

Yanagarutse ku mahirwe akomeye Intara y’Iburengerazuba ifite, asaba ko yashyirwa mu bikorwa by'umwihariko mu nzego nk'ubuhinzi, ubworozi, ubukerarugendo, inganda nto n’iciriritse, ubwikorezi n’ubucuruzi.

Mu rwego rwo kubaka ubufatanye burambye, Minisitiri yibukije ko ubushakashatsi ku bijyanye no kwigira ku murimo bwerekana ko 70% by’abagize ayo mahirwe babona akazi mu gihe kitarenze amezi atandatu nyuma yo gusoza.

Iyi nama yasize hashyizweho ingamba zo kongerera urubyiruko amahirwe n’ubumenyi, kongera ishoramari mu bikorwa bihanga imirimo no gukomeza ubufatanye hagati y’inzego za Leta n’abikorera.