Kuri uyu wa mbere, itsinda ry’Abasenateri bagize Komisiyo ya Sena y’Iterambere ry’Ubukungu n’Imari muri Sena y'u Rwanda, bari mu gikorwa cyo kugenzura ishyirwa mu bikorwa ry’ingamba za Guverinoma zigamije korohereza abaturage kubona ibicanwa bitangiza ibidukikije.

Iri tsinda ry’Abasenateri rigizwe na Senateri Nsengiyumva Fulgence na Senateri Mukabalisa Donathile, rikaba riri mu ruzinduko rugamije kurebera hamwe uko gahunda yo guteza imbere ikoreshwa ry’ibicanwa bitangiza ibidukikije ishyirwa mu bikorwa, n’uruhare rw’inzego z’ubuyobozi n’abafatanyabikorwa mu kuyishyigikira.

Abagize Komisiyo baganiriye n’ubuyobozi bw’Akarere ku mbogamizi n’ibyagezweho mu bijyanye n’ibicanwa bikomoka ku mirasire y’izuba, gaz n’ibindi bikoresho bigezweho bidatwika ibiti cyangwa amakara. Basobanuriwe uko abaturage babona ibi bicanwa, impamvu hari abatarabigeraho, ndetse n’ingamba zihari zo gukemura ibyo bibazo.

Senateri Nsengiyumva Fulgence yavuze ko nk’uko biteganywa mu nshingano za Sena, bagamije kugenzura no kugisha inama Leta ku bijyanye n’ishyirwa mu bikorwa rya politiki zifasha mu kurengera ibidukikije no kunoza imibereho myiza y’abaturage.

Umuyobozi w’Akarere yashimiye iri tsinda ry’Abasenateri ku gikorwa cy’ingirakamaro, anasobanura ko Akarere gafatanyije n’abafatanyabikorwa batandukanye mu bikorwa byo gukangurira abaturage gukoresha ibicanwa bitangiza ibidukikije, binyuze mu bukangurambaga n’imishinga yo kubaha ibikoresho bijyanye n’icyo gitekerezo.

Uru ruzinduko rwitezweho gutanga ibitekerezo bifatika bizafasha inzego zitandukanye kunoza gahunda zigamije gufasha abaturage kubona ibicanwa bigezweho kandi bitangiza ibidukikije.