Kuri uyu wa 31 Kanama 2025, mu Karere ka Rubavu hasojwe ingando z’Urubyiruko rw’Abadiventisti b’Umunsi wa Karindwi (Abajiya), zari zimaze ibyumweru bibiri zibera mu karere. Izi ngando zatangiriye ku wa 17 Kanama, zitabiriwe n’urubyiruko 735 rwaturutse mu turere twa Rubavu, Nyabihu na Rutsiro, rugahurira hamwe mu bikorwa byo kubumba amatafari azifashishwa mu kubakira abatishoboye.

Mu muhango wo gusoza izo ngando, Umuyobozi w’Akarere ka Rubavu Mulindwa Prosper ari kumwe n’abayobozi batandukanye barimo inzego z’umutekano ndetse n’Umuyobozi w’Itorero ry’Abadiventisti muri Filidi y’Amajyaruguru y’Iburengerazuba Pasiteri Nkundakozera Mutuyimana, bashimye uruhare urubyiruko rwagaragaje mu guharanira imibereho myiza y’abaturage no guteza imbere igihugu.

Umuyobozi w’Akarere yibukije uru rubyiruko ko intambwe bamaze gutera ari iyo gukomeza kubakiraho, abasaba kwirinda ibiyobyabwenge n’ibindi birangaza byangiza ejo hazaza h’urubyiruko, ahubwo bakaba intangarugero mu guharanira iterambere ry’igihugu. Ati: “Mufite imbaraga n’amahirwe yo kuba abayobozi b’ejo hazaza, mukwiye gukoresha uyu mwanya neza, mukabera abandi icyitegererezo mu gukunda igihugu no kugikorera.”

Mu gihe cy’ingando, uru rubyiruko rwagaragaje ibikorwa bifatika by’ubwitange no gufasha abatishoboye. Mu bikorwa by’indashyikirwa bakoze harimo kubumba amatafari agera ku 78,000, azifashishwa mu kubakira imiryango ikennye. Ni igikorwa cyashimangiwe nk’urugero rwiza rw’ubumwe, ubutwari n'ubushobozi bw'urubyiruko rwerekanye ko rushobora guhuriza hamwe imbaraga mu gukemura ibibazo byugarije sosiyete Nyarwanda.

Izi ngando kandi zashimangiwe n’ubutumwa bwatanzwe n’abayobozi batandukanye baje gusura urubyiruko mu bihe bitandukanye, barimo Guverineri w’Intara y’Iburengerazuba NTIBITURA Jean Bosco, wabasabye kuba ambasaderi b’amahoro, kurwanya ibiyobyabwenge n’ibisindisha ndetse no kubera bagenzi babo intumwa z’ubutumwa bwiza bahawe n'abayobozi batandukanye n'abagize inzego z'umutekano.

Pasiteri Nkundakozera Mutuyimana yashimye ubufatanye hagati y’Itorero, inzego z’ibanze n’urubyiruko, avuga ko ibyo bakoze ari igihamya cy’uko uburere bushingiye ku ndangagaciro z’imyemerere bushobora kugira uruhare rukomeye mu iterambere ry’igihugu.

Umuyobozi w'Akarere MULINDWA Prosper yashimiye Itorero ry'Abadiventisiti ku ruhare rwabo mu iterambere n'imibereho myiza y'abaturage abaha igikombe nk'ikimenyetso cy'ubufatanye mu iterambere n'Icyemezo cy'ishimwe, abizeza ubufatanye buhuriweho hashyirwa umuturage ku isonga.

Mu maso y’abitabiriye, byagaragaraga ko izi ngando zasize urubyiruko rufite icyerekezo n’umurava wo kuba umusemburo w’impinduka nziza mu gihugu. Byari igihe kiza cyo kwiga, gufashanya no gutekereza ku hazaza h’urubyiruko n’igihugu muri rusange.