Kuri uyu wa 29 Kanama 2025, Inama Njyanama idasanzwe y’Akarere ka Rubavu yateranye iyobowe na Perezida wayo Dr. Kabano Ignace, yemeza ku mugaragaro Icyerekezo cy’Iterambere cy’Akarere (District Development Strategy – DDS) 2024-2029.

Iki cyerekezo gishingiye ku gufasha Akarere kugera ku ntego z’igihe kirekire z’Igihugu, binyuze mu bikorwa bigamije guteza imbere imibereho myiza y’abaturage, kongera umusaruro w’ubukungu, no kubaka imiyoborere myiza ishingiye ku bufatanye n’abaturage.

DDS 2024-2029 ni inzira izafasha Akarere ka Rubavu kwihutisha iterambere ry’ubukungu bushingiye ku bukerarugendo n’inganda, kongera imbaraga mu rwego rw’ubuhinzi n’ubworozi, guteza imbere ibikorwa remezo, no kurushaho kubungabunga ibidukikije.

Perezida w’Inama Njyanama y’Akarere, Dr. Kabano Ignace, yashimangiye ko kwemeza iki cyerekezo ari intambwe ikomeye mu gutegura ejo hazaza h’Akarere, ahereye ku byo abaturage bakeneye no ku mpinduka zigaragara mu mitangire ya serivisi.

Iyi nama yanabaye umwanya wo kungurana ibitekerezo ku buryo ibikorwa biteganyijwe muri DDS 2024-2029 bizashyirwa mu bikorwa, hibandwa ku bufatanye bwa buri rwego, kugira ngo intego z’ubuyobozi bw’Akarere n’iz’igihugu zigerweho.