Nyuma y'ijoro ryo kwibuka ryo kuri uyu wa 29 Mata 2019, hakomeje igikorwa cyo kwibuka ku nshuro ya 25 Jenoside yakorewe abatutsi muri Mata 1994 by'umwihariko abiciwe mu cyahoze ari Perefegitura ya Gisenyi barimo abasaga 4613 bashyinguye mu rwibutso rwa Commune Rouge.

Iki gikorwa cyabimburiwe n'urugendo rwo Kwibuka rwaturutse mu mujyi wa Gisenyi (ku gisaha)  rwerekeza kuri Commune Rouge ahunamiwe inzirakarengane ziharuhukiye cyitabiriwe na Minisitiri w'ingabo Maj Gen Murasira Albert, Minisitiri w'Umuco na Siporo Hn Nyirasafari Esperance, Umuvunyi Mukuru Anastase Murekezi, Umujyanama wa Perezida mu by'umutekano General Kabarebe James, Senateri Ntawukuriryayo J Damascene, Guverineri w'Intara y'Iburengerazuba Munyantwari Alphonse ndetse n'uw'iy'Amajyaruguru Gatabazi JMV, Abadepite, Ubuyobozi bw'inzego z'umutekano mu ntara, CNLG, Ibuka ndetse n'abandi bayobozi batandukanye bari kumwe n'abacitse ku icumu ndetse n'abaturage biganjemo abo mu murenge wa Gisenyi.

Ubutumwa bwatanzwe n'abafashe ijambo, mu ndirimbo ndetse n'ubuhamya bwagarutse ku bugome Jenoside yakoranywe bugaya abishoye mu bwicanyi bushimira ingabo zayihagaritse ndetse n'Ubuyobozi bwiza bwongeye guha abacitse ku icumu icyizere cyo kubaho basaba Abanyarwanda by'umwihariko urubyiruko kwitandukanya n'ikibi kuko kitazigera gitsinda icyiza ahubwo bagashyira imbere ubumwe bw'Abanyarwanda barwanya ingengabitekerezo ya Jenoside n'igisa nayo cyose baharanira ko ibyabaye bitazasubira.

Minisitiri w'ingabo akaba n'imboni y'akarere ka Rubavu Jenerali Majoro Murasira Albert yemeje ko nta gihe ikibi kizaganza icyiza asaba Abanyarwanda by’umwihariko urubyiruko kwimakaza ubumwe birinda amacakubiri y’uburyo bwose ndetse n’ingengabitekerezo ya Jenoside kugira ngo ibabaye bitazasubira.

Yagize ati:"Mu gihe twibuka ku nshuro ya 25 bidufasha kurushaho kuzirikana,no guharanira ko ibyabaye bitazongera kubaho ukundi,ndasaba buri wese by'umwihariko urubyiruko kwitandukanya n'ikibi kuko kitazigera kiganza icyiza,ndabasaba kurwanya ingangabitekerezo ya jenoside n'amacakubiri aho ava akagea ahubwo tugaharanira kubaka Igihugu."

Urwibutso rwa Komine Rouge ruherereye mu murenge wa Gisenyi mu karere ka Rubavu ruruhukiyemo imibiri isaga 4613 biganjemo abiciwe mu cyahoze ari Perefegitura ya Gisenyi ndetse n’abandi bagiye baza basatira umupaka ngo bahungire muri Repubulika Iharanira Demokarasi ya Congo.