Inteko z'abaturage mu karere ka Rubavu zahujwe n'igikorwa cyo gutangiza ukwezi k'ubumwe n'ubwiyunge ahanashyizweho Ihuriro ry'ubumwe n'ubwiyunge ku rwego rw'Umudugudu igikorwa cyakorewe mu mirenge ya Busasamana, Nyundo, Mudende, Cyanzarwe na Nyamyumba cyitabirwa n' abayobozi batandukanye bavuye ku rwego rw'Igihugu.

Mu murenge wa Busasamana

Minisitiri w'ingabo Maj Gen Murasira Albert ari kumwe n'Ubuyobozi bw'inzego z'umutekano mu ntara ndetse n'Umuyobozi w'Akarere bifatanije n'abaturage mu nteko z'abaturage ahanatangirijwe ukwezi k'ubumwe n'ubwiyunge hanashyirwa Ihuriro ry'ubumwe n'ubwiyunge ku mudugudu.

Mu kiganiro cyatanzwe na Minisitiri w'ingabo yabibukije aho Igihugu cyavuye abagaragariza ko Ubumwe bw'Abanyarwanda ari ryo shingiro ry'iterambere abasaba kubwimakaza muri byose.

Mu murenge wa Rugerero

Ku kibuga cya Rwaza habereye umuhango wo gutangiza ukwezi k'ubumwe  n'ubwiyunge na gushyiraho ihuriro ry'ubumwe n'ubwiyunge ku Mudugudu.

Umushyitsi mukuru yari Senateri Nyagahuru Marguerite wari kumwe n'Umuyobozi w'Ishami ry'Imiyoborere myiza Gahunde Gilbert ndetse n'abahagarariye inzego z'umutekano.

Hashimiwe abatorewe kuyobora ihuriro ku mudugudu anabasaba gukomeza guharanira ubumwe n'ubwiyunge binyuze muri gahunda zitandukanye zashyizweho zigamije kubushimangira.

Mu murenge wa Nyamyumba

Murenge wa Nyamyumba habaye inteko y'abaturage yahuje abaturage bose b'Akagari ahatangijwe ukwezi k'ubumwe n'ubwiyunge no gushyiraho ihuriro ry' ubumwe n'ubwiyunge mu Mudugudu.

Umushyitsi Mukuru yari Hon Senateur Niyongana Galican waje aherekejwe n'uwaje ahagarariye Akarere ka Rubavu,Dukundimana Esperance Umuyobozi W'Ishami ry 'ubutegetsi n'imicungire y'abakozi.

Abaturage basabwe gushimangira ubumwe bwabo kuko aribwo musingi w' iterambere.

Mu murenge wa Rubavu

Inteko z'abaturage no gutangiza ukwezi k'ubumwe n'ubwiyunge mu murenge wa Rubavu byitabiriwe na Perezida wa Komisiyo y'Igihugu y'Ubumwe n'Ubwiyunge Bishop John Rucyahana  wabanje kugaragariza abaturage umwanya Akarere ka Rubavu kariho mu bumwe n'ubwiyunge nyuma agaragaza inzira Igihugu cyacu cyaciyemo muri iyi myaka 25 y'ubumwe n'ubwiyunge.

 Yasabye abanyarubavu gushyira imbere ubumwe bwabo kurusha ibindi byose anabatanguriza ku mugaragaro ukwezi k'ubumwe n'ubwiyunge ndetse n'ihuriro ry'ubumwe n'ubwiyunge mu midugudu.

Akarere kari gahagarariwe na Bwana Habimana Martin Umujyanama wa Komite Nyobozi.

Mu murenge wa Nyundo

Inteko z'abaturage no gutangiza ukwezi k'ubumwe n'ubwiyunge mu murenge wa Nyundo byitabiriwe na Honorable Depute MUREKATETE M Therese waje gutangiza ihuriro ry'ubumwe n'ubwiyunge Ku mudugudu no gutangiza ukwezi kwahariwe ubumwe n'ubwiyunge mu murenge wa Nyundo.

Mu butumwa bwatanzwe abaturage basabwe kwirinda amacakubiri ayo ariyo yose bagashyira imbere ubumwe bw'Abanyarwanda.

Mu murenge wa Cyanzarwe

Inteko z'abaturage no gutangiza ukwezi k'ubumwe n'ubwiyunge ndetse no gushyiraho Ihuriro ry'ubumwe n'ubwiyunge mu midugudu mu murenge wa Cyanzarwe byitabiriwe na Hon  Depute UWAMBAJE Aimee Sandrine  waganirije abaturage ku gaciro ntagereranywa k'ubumwe n'ubwiyunge bw'Abanyarwanda abasaba gukomeza kubushimangira.