Guverineri w'Intara y'Iburengerazuba Munyantwari Alphonse ari kumwe n'Ubuyobozi bw'inzego z'umutekano mu ntara no mu karere, Ubuyobozi bw'Akarere n'ubw'Umurenge bitabiriye Inama y'Umutekano mu murenge wa Bugeshi bashimira abaturage uruhare mu gukomeza kuwubumbatira.

Mu butumwa bwatanzwe muri iyi nama yateranye kuri uyu wa 06 Ukwakira 2019 Umuyobozi wa Polisi mu ntara y’Iburengerazuba CP Rutikanga Rogers yasabye abaturage  gukomeza kwicungira umutekano bahereye ku gukumira icyaha kitaraba batangira amakuru Ku gihe, kurwanya ibiyobyabwenge ndetse no  guca ukubiri n’ubushoreke n'iharika.

Umuyobozi w’Ingabo mu ntara y’Iburengerazuba Maj Gen Alex Kagame yashimiye abaturage ubufatanye butajegajega bafitanye n’Ingabo mu gukumira icyo ari cyo cyose cyahungabanya umutekano kikabasubiza mu bihe bibi by’umutekano muke byaranze agace batuyemo abasaba gukomeza kwishimira byinshi bimaze kugerwaho birinda icyabisenya.

Yagize ati: ‘’ Dushima cyane ubufatanye n’ingabo mu kwicungira umutekano bubaranga umunsi ku munsi ariko ni nangombwa ko tujya tunagaruka ku bihe by’umutekano muke byaranze aka gace mutuyemo aho n’uwari ukiri muto yabibwiwe ku buryo ntanumwe muri twe wabyifuza.’’

Yakomeje agira ati: ‘’ Hari byinshi bimaze kugerwaho birimo amashuri ,amashanyarazi,imihanda, amavuriro n’ibindi ariko tutanirengagije iterambere rya buri wese ku giti cye, ntabwo rero dukwiye guha icyuho uwashaka kudusubiza inyuma.’’

Uretse kubumbatira umutekano kuko ariwo shingiro rya byose Igihugu gikomeje kugeraho, Guverineri yakanguriye abaturage  kurangwa n'isuku, kuboneza urubyaro,kugira ingo, kuboneza imirire, kwitabira gahunda ya Ejo Heza ndetse no gukomeza kwirinda Ebola bakaraba intoki ariko banatanga amakuru ku ugaragaje ibimenyetso byayo.