Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza y’abaturage Dr Mukabaramba Alvera ari kumwe n'Umuyobozi mukuru ushinzwe imibereho myiza y'Abaturage Sheikh Bahame Hassan bifatanije n’abaturage b’Umurenge wa Nyundo mu nteko abasaba gukomeza kwitabira gahunda za Leta zitandukanye.

Nk’uko yabigarutseho aganiriza aba baturage mbere yo gufatanya nabo gukemura ibibazo yabanje kugaruka ku myitwarire ikwiye gukomeza kuranga Abanyarwanda beza by’umwihariko muri iyi minsi 100 yo gukomeza kwibuka ku nshuro ya 25 Jenoside yakorewe abatutsi muri Mata 1994.

Yagize ati:’’ Ndabanza kwihanganisha Abanyarwanda bose muri rusange by’umwihariko abacitse ku icumu nkanaboneraho gusaba buri wese gukomeza kubafata mu mugongo ndetse no kwirinda ingengabitekerezo ya jenoside ndetse n’amagambo asesereza muri iki gihe cyo kwibuka gikomeza mu minsi 100 hirindwa ko ibyabaye byazasubira.’’

Yakomeje abashishikariza kwitabira gahunda za Leta zigamije iterambere n’imibereho myiza zirimo gukomeza kurangwa n’isuku birinda kurarana n’amatungo , kugira ubwiherero bwujuje ibisabwa, kuboneza urubyaro ndetse bakanakomeza guharanira kuzamura imibereho myiza y’imiryango yabo.

Mbere yo kuganira n’abaturage aba bashyitsi bari kumwe n’Umuyobozi w’Akarere Habyarimana Gilbert,Umuyobozi w’Akarere wungirije ushinzwe imibereho myiza Uwampayizina Marie Grace, abahagarariye inzego z’umutekano ndetse n’Umuyobozi wa Ibuka n’uwa CNLG mu karere ndetse n’abahagarariye abacitse ku icumu babanje gusura Urwibutso rwa Nyundo hunamirwa abatutsi bishwe muri jenoside yo muri Mata 1994 basaga 1000 baruruhukiyemo biganjemo abiciwe muri Katedarali ya Nyundo ndetse no mu nkengero zayo.