Nyama y'ubukangurambaga mu rubyiruko rwize imyuga rusabwa kwibumbira mu makoperative, abibumbiye muri Koperative COMEMA bahawe inguzanyo y'ibikoresho ya miliyoni 5 bakayishyura neza,bongerewe indi ya Miliyoni 10 igiye kubafasha kwagura ibikorwa byabo by'ubukanishi.

Izi nguzanyo zombi iyi Koperative yahawe binyuze muri BDF na SACCO Umwimerere/Nyundo yazihawe nyuma yo kugaragaza umushinga wo gukorera ibikorwa by'ubukanishi mu Murenge wa Kanama mu Kagari ka Mahoko.

Nk'uko byagarutsweho n'Umuyobozi w'iyi Koperative ngo inguzanyo ya mbere y'ibikoresho bahawe yabafashije gutangira ibikorwa by'ubukanishi bari barize ndetse binyuze mu gukorera mu mucyo no gufatanya byakomeje kubaranga babasha kuyishyura neza ari nabyo byatumye bahabwa iyindi ya Miliyoni 10.

Yagize ati:'' Nyuma yo gukangurirwa kwishyira hamwe no kubona ko ari byo byadufasha kwiteza imbere twibumbiye muri iyi Koperative,duhuza ubushobozi buke twari dufite hanyuma dusaba inguzanyo binyuze mu Kigega cya BDF aho twahawe inguzanyo ya Miliyoni 5. Twiyemeje kuzikoresha neza rero ndetse tukishyura nk'uko byari biteganijwe ari nayo mpamvu uyu munsi batwongeye indi ya Miliyoni 10.''

Yongeraho ko ibikoresho bahawe bifite agaciro k'izi Miliyoni 10 bagurijwe bigiye kubafasha kwagura ibikorwa byabo by'ubukanishi bityo igaraje ryabo rikaza mu magaraje ya mbere mu Karere ka Rubavu ku buryo bizeye kutazabura ubwishyu.

Umukozi w'Akarere ushinzwe gukangurira imirimoTwizerimana Devota ashima uru rubyiruko rugize iyi koperative agasaba urukiri mu bushomeri ruvuga ko akazi ka buze kurwigiraho bityo rukabyaza umusaruro amahirwe atandukanye Igihugu cyarushyiriyeho kugira ngo rwiteze imbere.

Yagize ati:''Turashimira cyane abagize Koperative COMEMA kuko bakomeje gutanga urugero rwiza no ku rundi rubyiruko aho biyemeje kwibumbira hamwe ndetse bagakora cyane bigaragazwa n'ibikorwa by'indashyikirwa bakomeje kwigezaho.Bikwiye rero kubera n'abandi urugero bakitabira kubyaza umusaruro amahirwe menshi yo kwiteza imbere bakesha Ubuyobozi bwiza bw'Igihugu.''

Akomeza asaba urubyiruko rutandukanye kwigira ku bagize iyi koperative, rugakura amaboko mu mifuka ndetse rukibumbira hamwe kugira ngo ruzabashe kubyaza umusaruro amahirwe atandukanye rwashyiriweho.