Kuri uyu wa Gatatu tariki 15 Ukwakira 2025, mu murenge wa Busasamana hizihirijwe umunsi Mpuzamahanga w'Umugore wo mu Cyaro ufite isanganyamatsiko igira iti “Umugore ni uw'Agaciro”. Ni ibirori Visi Meya ushinzwe imibereho myiza y’abaturage, ISHIMWE Pacifique yitabiriye, ari kumwe n’abayobozi batandukanye ndetse n’inzego z’umutekano, bifatanya n’abaturage b’uy Murenge wa Busasamana mu birori byo kwizihiza Umunsi Mpuzamahanga w’Umugore wo mu Cyaro.

Uyu munsi wizihijwe ku nsanganyamatsiko igira iti “Umugore ni uw’Agaciro”, hagamijwe kuzirikana no gushimira uruhare rw’umugore mu iterambere ry’umuryango n’igihugu muri rusange, ndetse no gukangurira abagore bo mu cyaro gukomeza kugira uruhare mu bikorwa bibateza imbere.

Mu butumwa bwe, Visi Meya ISHIMWE Pacifique yashimiye abagore bo mu cyaro ku mbaraga n’ubwitange bagira mu bikorwa by’iterambere, abasaba gukomeza kugira ijambo mu mibereho y’imiryango yabo n’aho batuye, aho yagize ati "Umugore wo mu cyaro ni inkingi ikomeye mu muryango n’iterambere ry’igihugu. Ni ngombwa ko abagore bunganirwa kugira ngo bashobore kugira uruhare rugaragara mu bukungu, uburezi, isuku n’imibereho myiza y’imiryango yabo.” 

Na we, Komiseri mu Nama y'Igihugu y'Abagore, Madamu Kantengwa Henriette, yavuze ko kwizihiza Umunsi Mpuzamahanga w’Umugore wo mu Cyaro ari umwanya wo kuzirikana uruhare rw’umugore mu mibereho ya buri munsi, kumushyigikira no kumwibutsa ko ashoboye mu rugendo rwo kwiteza imbere, ati “Uyu munsi ni uwo gushimira abagore bo mu cyaro ku mbaraga zabo, ariko kandi ni n’umwanya wo kubibutsa ko bashoboye, ko bafite ubushobozi bwo guteza imbere imiryango yabo n’igihugu muri rusange.” 

Kuri uyu hashimiwe Abagore bagiye bagira uruhare mu kwiteza imbere bahereye ku mhairwe make bagiye babona bityo bakaboneraho kuyabyaza umusaruro aho bahawe Seritifika z'ishimwe ku bw'ibyo babashije kwigezaho. Hari kandi abagore batishoboye bafashijwe bahabwa ibiryamirwa ndetse imiryango ihabwa ibigega byo kubafasha kubika amazi aho batuye.

Ibirori byaranzwe n’imbyino n’indirimbo zigaragaza agaciro k’umugore, ibikorwa byo gushimira abagore bageze ku bikorwa by’indashyikirwa mu iterambere ry’imiryango, ndetse no kugaragaza ibikorwa by’iterambere bikorwa n’amakoperative y’abagore mu Murenge wa Busasamana. Abaturage bitabiriye uyu munsi bashimye ubuyobozi bw’Akarere ka Rubavu ku gukomeza gushyigikira abagore bo mu cyaro, banasezeranya gukomeza kugira uruhare mu iterambere ryabo n’iry’igihugu.

Uyu munsi wizihizwa buri mwaka ku rwego rw’Isi kugira ngo hashyirwe imbere agaciro k’umugore wo mu cyaro, hagamijwe kumwibutsa uruhare rwe mu kwihutisha iterambere rirambye no kubaka sosiyete itekanye kandi igira uruhare rungana hagati y’abagore n’abagabo.