Akarere ka Rubavu kongeye kwibutsa abikorera batandukanye bitabiriye Rubavu Investment Forum yabaye kuri uyu wa 19 Mata 2019 ko kiteguye kuborohereza mu ishoramari uko bishoboka kose bityo ko bakwiye kwihutira kugashoramo imari cyane ko amahirwe ahari ari ay’igihe kirekire bityo hakaba nta mpungenge zigihombo zihari.

Nk’uko byagarutsweho mu nama y’ishoramari yateguwe n’Akarere ka Rubavu kubufatanye na RDB,Urugaga rw’abikorera mu karere ndetse n’Ihuriro ry’abafatanyabikorwa b’Akarere mu iterambere JADF Icyerekezo Rubavu abayitabiriye bagaragarijwe amahirwe y’ishoramari ari mu karere haba mu bukerarugendo ndetse no mu bucuruzi.

Mu byagaragajwe mu bukerarugendo harimo kubaka hoteli zigezweho,gutunganya umwaro w’ikiyaga cya Kivu ndetse n’imisozi itandukanye irimo uwa Rubavu ,uwa Rwaza, ibere rya bigogwe n’ibindi.

Mu bucuruzi harimo gutangira inganda ziganjemo  izitunganya umusaruro w’ubuhinzi n’ubworozi, gushora imari mu bucuruzi bwambukiranya imipaka hongerwa ibyoherezwa mu mahanga, kubaka inzu zo guturamo ziciriritse ndetse n’ibyumba mberebyombi bifite ubushobozi bwo kwakira inama mpuzamahanga,ubwikorezi bwo mu mazi n’ibindi.

Umuyobozi w’Akarere ka Rubavu Habyarimana Gilbert yagaragaje ko hakenewe ishoramari mu bucuruzi n’ubukerarugendo hashingiwe ku mishinga y’ibanze yatoranyijwe anemeza ko n’ufite igitekerezo kihariye yemerewe kukigaragariza Ubuyobozi nyuma yo kukinoza agaherekezwa mu rugendo rwo kugishyira mu bikorwa.

Agira ati:“Twiyemeje kuba Irembo ry’Igihugu mu ishoramari n’ubukerarugendo kubera imiterere y’Akarere kacu y’ubwiza nyaburanga ikanatuma duhahirana n’uturere 5 tw’Intara y’Uburengerazuba ndetse  n’Igihugu cy’abaturanyi cya Repubulika iharanira Demokarasi ya Congo.”

Yemeza ko Akarere kiyemeje gufatanya no gutera ingabo mu bitugu buri wese wifuza gukorana nako muri icyo cyerekezo habyazwa umusaruro amahirwe y’ishoramari ahari mu rwego rwo kurushaho kwihutisha iterambere.

Umuyobozi ushinzwe gutezimbere ishoramari muri RDB Winifrid Ngangure avuga ko u Rwanda rushyize imbere korohereza abikorera ndetse ruri ku mwanya mwiza haba ku mugabane wa Afurika ndetse no ku isi agashimangira ko amahirwe yose ahari yakabaye abyazwa umusaruro.

Agira ati:”Uhereye ku karere ka Rubavu hari byinshi abikorera bakora bakunguka kandi bakiteza imbere ndetse n’Igihugu muri rusange, Igihugu cyacu gishyize imbere korohereza ishoramari aho uretse koroherezwa mu bijyanye n’imisoro abashoramari baherekezwa mu nzira yo kwiteza imbere.’’

Yemeje ko Igihugu cyiyemeje korohereza abashoramari hagabanywa imisoro ndetse rimwe na rimwe ikanakurwaho by’umwihariko ku bifuza gutangira inganda bajya gushaka imashini hanze y’Igihugu.”

Ku ruhande rw’abashoramari Perezidante w’Abikorera mu karere ka Rubavu yagize ati: ‘’Turashima Ubuyobozi bukomeje kugenda butworohereza, natwe hari imishinga twatangiye gukorera inyigo kandi dufite ubushake mu rwego rwo kwiteza imbere no guteza imbere Igihugu cyacu muri rusange.”

Minisitiri w’Ingabo akaba n’imboni y’Akarere ka Rubavu Maj Gen Murasira Albert yashimangiye ko ishoramari ari ikintu gikomeye kuko usanga ari ryo shingiro ry’iterambere ry’ibihugu bitandukanye agaragaza ko u Rwanda rwiyemeje korohereza abashoramari uko bishoboka kose.

Yagize ati: ‘’Icyo dusaba Ubuyobozi bw’Akarere ni ugukorane neza n’abashaka gushora imari habyazwa umusaruro amahirwe menshi ahari kugira ngo dukomeze kwihura mu iterambere bubafasha muri byose bakeneye kugira ngo babashe kungukira mu byo bakora.’’

Bimwe abashoramari bagaragaje ko bashaka gushoramo Imari ku ikubitiro harimo nko  kubaka gare ya Rubavu, isoko rigezweho, inyubako z’ubucuruzi n’inyubako zo guturamo,kongera amahoteri afite ibyumba mberabyombi bishobora kwakira inama mpuzamahanga kugeza ubu zibera mu mujyi wa Kigali gusa n’ibindi.

Nyuma y’ibiganiro, abashoramari batemberejwe hirya no hino mu karere bagaragarizwa amahirwe ahari ndetse n’uburyo yabyazwa umusaruro mu ishoramari riganisha ku iterambere rya buri wese.