Mu nteko rusange y’Ihuriro ry’abafatanyabikorwa b’Akarere ka Rubavu mu iterambere JADF Icyerekezo yateranye ku wa 24 Gashyantare 2021 hifashishijwe ikoranabuhanga Ubuyobozi bw’Akarere bwabasabye kugira uruhare mu kurangiza ibibazo bikibangamiye imibereho myiza y’abaturage birimo by’umwihariko kubonera amacumbi abatayafite.

Nk’Uko Umuyobozi w’Akarere ka Rubavu Habyarimana Gilbert yabigarutseho ngo Akarere gafite abafatanyabikorwa  bahagije kugira ngo ibibazo byose bigihari bibangamiye imibereho myiza y’abaturage bikemurwe buri wese abigizemo uruhare.

Yagize ati:’’Iyo witegereje urutonde rurerure rw’Abafatanyabikorwa Akarere kacu gafite usanga nta gisobanurao na kimwe gihari cy’uko hari abaturage bagifite ibibazo bitandukanye by’imibereho birimo nko kutagira amacumbi,ubwiherero n’ibindi. Ni mureke twiyemeze duhagurukire rimwe murebe ko bidahita birangira.’’

Yongeraho ko uretse kugira uruhare mu gukemura ibi bibazo bikibangamiye imibereho myiza y’abaturage buri mufatanyabikorwa akwiye kujya ahuza iteganyabikorwa rye n’iry’Akarere kugira ngo harusheho guhurizwa hamwe imbaraga bityo iterambere ryihute kurushaho.

Perezida wa JADF Icyerekezo/Rubavu Mwongereza Clement ashimira abafatanyabikorwa bari baratangiye kugira uruhare mu gukemura ibi bibazo agasaba n’abandi kubyinjiramo kandi buri wese akabigira ibye mu cyerezo cyo gukomeza gushyira umuturage ku isonga.

Ku ruhande rw’Abafatanyabikorwa nabo bagaragaza ko bidakwiye kuba hari umugenerwabikorwa wabo kugeza ubu udafite icumbi cyangwa ubwiherero biboneye bakizeza ko ibi bibazo bagiye kubihurizaho imbaraga bigakemuka bidatinze.

Mu rwego rwo gukemura ibibazo bibangamiye imibereho myiza y’abaturage, buri mwaka mu Mihigo y’Akarere haba harimo umubare w’amazu,ubwiherero ndetse no gutanga ubufasha butandukanye ku batishoboye hagamijwe kubazamurira imibereho no kubafasha kwigira.