Itsinda ry'abadepite bagize Komisiyo y'imibereho myiza baje mu gikorwa cyo kugenzura imikorere y'ibigo mbonezamikurire y'abana bato mu kurwanya igwingira n'imirire mibi mu bana.
 

Umuyobozi w'Akarere wungirije ushinzwe imibereho myiza yagaragaje ko hafashwe ingamba zo gufatanya n'abafatanyabikorwa kurwanya igwingira mu miryango ifite abana bari mu mirire mibi aho bafasha mu kwigisha: Gukora Guhitamo umuntu wita ku mwana (parrainage) y'imiryango ifite abana bari mu mirire mibi, Kubaka ingo mbonezamikurire, Kubaka uturima tw'igikoni.

Yagaragaje kandi ko hari udushya dukoreshwa mu gukemura ikibazo cy'igwingira n'imirire mibi ari two: Gahunda y'umuyobozi mu isibo, Wigwingira mpari, Operation Nyabagobe, Ntukabure amata muturanyi ndahari ashimangira ko hakomeje kugaragara ibyiciro by'ingo zifite imirire mibi, aho usanga ababyeyi batita ku mirire y'abana kubera ubumenyi buke Ku mirire mibi, imirerere n'imikurire y'umwana. Yahwituye abibwira ko imirire mibi igaragara mu baturage bakennye ko bakwiye guhindura imyumvire. Asaba ababyeyi b'abagabo kongera uruhare rwabo kumva ko barebwa n'imibereho myiza y'umwana buri wese agatanga icyo afite. Yagaragaje uruhare rw'igikoni cy'umudugudu mu Kugira ifunguro ryuzuye ry'abana baba bari mu bigo mbonezamikurire aho ababyeyi  batanga umusanzu wabo mu kuzamura Imibereho myiza y'abana.

Depite Mukarusagara Éliane avuga ko kurwanya igwingira bishingira ku kuboneka kw'ibiribwa n'intungamubiri zabyo nuko bitegurwa bikagira uruhare mu buzima bwiza bw'umwana.
 

Padiri J.Paul Rutakisha Yagarutse kukibazo cy'ama ECDS aho yavuzeko uruhare rw'abagabo rukenewe cyane mu kunoza imirirebn'imikurire y'abana, anashumangirako ababyeyi bakwiye kunoza isuku kuko nayo iba intandaro y'indwara z'abato nahato.

Umuyobozi Mukuru w'ibitaro bya Gisenyi Dr. Tuganeyezu Oreste yagarutse ku bijyanye n'abana bavukira mu ngo aho usanga abana bavuka kubana batewe inda zitategantijwe aribo bisanga muri mu mirire mibi. Avuga ko kurinda umwana kujya mu mirire mibi biruta kumuvuza.
 
 

Bayitsinga Innocent Yavuze ko bitewe n'imiterere y'akarere kacu, aho usanga abagore aribo bakora akazi k'Abagabo kandi abagabo batari bukore akazi k'abagore, bo bazinduka bajya gushaka ubuzima, kandi umugabo atari busigare mu rugo ngo ategure rya funguro ryuzuye. Abana baterwa inda zitateganyijwe, badafite ubumenyi buhagije Ku buzima bw'imyororokere, imitegurire y'indyo yuzuye no kubyara imburagihe ari  zimwe mu mpamvu zitera ubwiyongere bw'abaturage, igwingira n'imirire mibi ugasanga bigumye muri urwo ruhererekane. Yasabye ko abana batarageza igihe cy'ubukure bajya bashakirwa imirimo mu Rwanda bikabarinda kwambuka igihugu bajya gushaka imirimo mu mahanga.

Umuyobozi w'Akarere Yavuze ko udashobora gukemura ikibazo cy'imirire mibi utabihereye mu miryango. Avugako igisubizo ari uguharanira ko nyirubwite agira uruhare mu gukemura ikibazo. yagize kandi ati: “Dukwiye gukorera hamwe nta kurangara no gusubira inyuma, hakorwe ubugenzuzi n'ikurikiranabikorwa kugira ngo duce imirire mibi.”