RUBAVU: DUSENYERE UMUGOZI UMWE MU GUTEZA IMBERE IMIBEREHO MYIZA Y'ABATURAGE - MEYA MULINDWA Prosper

Kuwa 19 Kanama 2026, Umunyamabanga Nshingwabikorwa w’Intara y’Iburengerazuba, ari kumwe n’Umuyobozi w’Akarere ka Rubavu, batangije ku mugaragaro imurikabikorwa rya JADF–Icyerekezo 2026, igikorwa cyabereye ku Kigo cy’Urubyiruko cya Rubavu, ku nsanganyamatsiko igira iti: “Uruhare rw’abafatanyabikorwa mu iterambere ry’abaturage.”

Iki gikorwa cyahurije hamwe abafatanyabikorwa batandukanye mu iterambere, hagamijwe kugaragaza uruhare rwabo mu guteza imbere imibereho y’abaturage, gusangira ibyakozwe ndetse no kurushaho kunoza ubufatanye mu bikorwa bigamije gukemura ibibazo abaturage bafite.

Mu butumwa bwatanzwe, hagaragajwe ko hakenewe ubufatanye burambye bugomba kongera ubushobozi bw’abaturage, guteza imbere imibereho yabo no kubafasha kwikura mu bukene. Abafatanyabikorwa basabwe kugira icyerekezo kimwe no guhuza imbaraga, bakorera abaturage kandi ibikorwa byabo bikuzuzanya.

Hagaragajwe kandi ko imurikabikorwa rya JADF–Icyerekezo ritagamije gusa kugaragaza ibikorwa byagezweho n’abafatanyabikorwa, ahubwo ari n’umwanya wo kugaragaza imbaraga z’ubufatanye n’umusaruro wabwo mu iterambere ry’abaturage. Ni kandi umwanya utuma abaturage bamenya serivisi, gahunda n’ibikorwa bitangwa n’abafatanyabikorwa batandukanye, bityo bakamenya amahirwe n’ubufasha bashobora kubona.

Mu butumwa bwe, Umuyobozi w’Akarere ka Rubavu, Mulindwa Prosper, yagaragaje ko ubufatanye burambye hagati y’Akarere n’abafatanyabikorwa ari ingenzi mu guteza imbere abaturage, kongera ubushobozi bwabo no kubafasha kwikura mu bukene ati “Dukeneye ubufatanye bushobora kwihagararaho bukazamara igihe kirere n'ubushobozi bw'Abaturage. Tugire abafanyabikorwa bafite icyerekezo kimwe kandi dusenyere umugozi umwe dukorere abaturage kandi tubazamurire urwego rw'imibereho tubafasha kwikura mu bukene.”

Umunyamabanga Nshingwabikorwa w'Intara y'Iburengerazuba Uwambajemariya Florence nawe witabiriye iki gikorwa yavuze ko imurikabikorwa atari umwanya wo kugaragaza gusa ibyo abafatanyabikorwa bagezeho, ahubwo ari n’akanya ko gukomeza ubufatanye no kumenyekanisha serivisi n’ibikorwa bigirira abaturage akamaro ati “Imurikabikorwa si aho kugaragariza ibyakoze gusa, ahubwo ni aho kugaragariza imbaraga z'ubufatanye. Uyu mwanya utuma abaturage bamenya serivisi nibikorwa bitangwa n'abafatanyabikorwa. Rubavu nka kamwe mu Mijyi ifite amahirwe menshi hakaba n'igicumbi cy'ubukerarugendo hakwiye kwimakazwa isuku na serivisi nziza ku batugana.”

Iri murikabikorwa ryabaye umwanya wo guhuza abafatanyabikorwa batandukanye, kumenyekanisha serivisi n’ibikorwa byabo, no kungurana ibitekerezo ku buryo ubufatanye bwakomeza kugira uruhare mu iterambere ry’Akarere.