NI NGOMBWA KO ABABYEYI N’ABAREZI BASHYIRA IMBERE IMIRIRE IKWIYE KANDI IKUNGAHAYE KU NTUNGAMUBIRI, KUGIRA NGO ABANA BAKURE NEZA BARI MU RUGO NO KU ISHURI.

Akarere ka Rubavu kifatanyije n’isi kwizihiza Umunsi Mpuzamahanga w’Ibiribwa (World Food Day), umunsi wizihizwa kuwa 16 Ukwakira buri mwaka. Insanganyamatsiko y'uyu mwaka iragira iti “Hanga udushya uyu munsi, ejo hazaza habe heza”.

Ku rwego rw’Akarere, uyu munsi wizihirijwe mu Ishuri rya GS Rambo, riherereye mu Murenge wa Nyamyumba, witabirwa n’Umuyobozi w’Akarere wungirije ushinzwe Imibereho Myiza y’Abaturage, Ishimwe Pacifique.

Ibikorwa byaranze uyu munsi birimo gutera imboga, kugaburira abana, ibiganiro ku nsanganyamatsiko yawo no gushishikariza ababyeyi gushyigikira gahunda yo kugaburira abana ku mashuri. Hanashimangiwe uruhare rw’udushya n’ikoranabuhanga mu guteza imbere ubuhinzi burambye no kunoza imirire.

Mu butumwa bwe, Ishimwe Pacifique yasabye ababyeyi n’abarezi gushyira imbere indyo yuzuye kandi ikungahaye ku ntungamubiri, haba mu rugo no ku ishuri, kugira ngo abana bakure neza kandi bagire ubuzima bwiza.

Yagize ati: “Ni ngombwa ko ababyeyi n’abarezi bita ku mirire ikwiye kandi ikungahaye ku ntungamubiri kugira ngo abana bakure neza, haba mu rugo ndetse no ku ishuri by’umwihariko. Dukwiye gushyira imbaraga muri gahunda yo kugaburira abana ku mashuri, tuyishyigikira kandi tunazamura ireme ry’uburezi.”

Kwizihiza uyu munsi byashimangiye akamaro ko guhanga udushya no gufatanya mu guteza imbere umutekano w’ibiribwa n’imirire myiza, by’umwihariko ku bana, kugira ngo bagire ubuzima bwiza kandi bagire uruhare mu iterambere ry’Igihugu.