Skip to main content Skip to page footer
Urubuga rwemewe rwa Leta y’u Rwanda
Coat of arms of RwandaAkarere ka Rubavu

MWISHAKEMO IBISUBIZO MUSHINGIYE KU BUMENYI MWAHAWE N'ANDI MAHIRWE MUFITE ABAKIKIJE. - VISI MEYA ISHMWE PACIFIQUE

24 July 2026

 

Kuri uyu wa 24 Nyakanga 2026, kimwe n'uko byakozwe mu Turere twose tw'Igihugu,mu Karere ka Rubavu hatangijwe ku mugaragaro Gahunda y'Intore mu Biruhuko 2026. 

Mbere y'itangizwa ry'iyi gahunda, Madamu Ishimwe Pacifique yasuye ibikorwa bitandukanye by'imikino n'imyidagaduro byari byateguriwe urubyiruko, agaragaza ko siporo n'imyidagaduro bifite uruhare rukomeye mu kubaka ubuzima bwiza, guteza imbere impano no gukomeza ubumwe n'ubufatanye mu rubyiruko.

Uyu muhango witabiriwe n'abahagarariye inzego z'umutekano, abakozi b'Akarere n'Imirenge, abayobozi b'ibigo by'urubyiruko, ababyeyi, abahagarariye amakipe n'amashyirahamwe ya siporo, abafatanyabikorwa mu iterambere ndetse n'urubyiruko rwaturutse hirya no hino mu Karere ka Rubavu.

Mu ijambo ry'ikaze, Umunyamabanga Nshingwabikorwa w'Umurenge wa Rubavu, Bwana Rwibasira Jean Bosco, yashimiye abitabiriye umuhango anagaragaza imyiteguro yakozwe kugira ngo gahunda y'ibikorwa by'urubyiruko mu biruhuko izashyirwe mu bikorwa neza muri uwo Murenge, mbere yo guha ijambo Umushyitsi Mukuru.

Mu ijambo rye, Umuyobozi w'Akarere wungirije ushinzwe Imibereho Myiza y'Abaturage yasobanuye ko gahunda y'Ibikorwa by'Urubyiruko mu Biruhuko igamije guhuriza hamwe urubyiruko rwo mu byiciro n'imyaka itandukanye, rugahabwa amahirwe yo kwidagadura, kwiga no kwiyubaka. Yagaragaje ko ibikorwa bizajya bikorwa iminsi itatu mu cyumweru, buri wa Mbere, uwa Gatatu n'uwa Gatanu, bikazasozwa ku wa 28 Kanama 2026.

Yongeyeho ko iyi gahunda izahuza siporo n'imyidagaduro n'ibiganiro byigisha indangagaciro, uburere mboneragihugu, gukunda Igihugu ndetse n'umuco wo kwirinda imyitwarire ishobora kubagiraho ingaruka mbi.

Madamu Ishimwe Pacifique yasabye urubyiruko kubyaza umusaruro amahirwe ruhabwa na Guverinoma, kwirinda ibiyobyabwenge n'izindi ngeso mbi, ndetse no kubahiriza amabwiriza y'umutekano harimo no kwirinda koga ahatemewe. Yabasabye kwitabira gahunda zateguwe kugira ngo bazasubire ku ishuri bafite ubumenyi bushya, indangagaciro nziza n'ubumenyi ngiro buzabafasha mu buzima bwabo bwa buri munsi.

Yanashishikarije urubyiruko gukurikira neza amasomo n'amahugurwa yose ateganyijwe muri iyi gahunda, anasaba abatoza n'abayobozi b'ibikorwa gukomeza gushimira no guhemba abitwaye neza kugira ngo bibafashe gukomeza kugira ishyaka no kwitwara neza.

Umuhango wasojwe no guha impamyabushobozi urubyiruko 252 rwari rumaze gusoza amahugurwa y'imyuga atandukanye. Madamu Ishimwe Pacifique yabashimiye umuhate bagaragaje, abashishikariza gushyira mu bikorwa ubumenyi bungutse kugira ngo bibafashe kwihangira imirimo, guteza imbere imibereho y'imiryango yabo no kugira uruhare mu iterambere ry'Igihugu.

Back